|
Медся-медсяыс и вермӧ лоны Геройӧн
Батьлӧн дядь (менам пӧчлӧн вок) ичӧтсяньыс бӧж моз вӧтлысьлӧма бать бӧрсяыс, пыр мыйкӧ юасьлӧма, велӧдчӧма уджавны кинас, ёнмӧдӧма асьсӧ уялӧмӧн да ислалӧмӧн, кыйлӧма чери. Радейтӧма математика, школа помалӧм бӧрас пырӧма велӧдчыны Коми пединститутӧ физика-математика факультетӧ. Мӧд вонас заводитчӧма война… Студентъяс пӧшти став курснас вӧзйысьӧмаӧсь фронт вылӧ. Георгийӧс мӧдӧдӧмаӧсь Архангельскса военно-инженернöй училищеӧ. Недыр кад велӧдчӧм бӧрын сійӧ лоӧма сапёръяслӧн взводса командирӧн. Том, повтӧм, сюсь, унатор кужысь морт фронт вылын вермис петкӧдлыны асьсӧ сӧмын медся бур боксянь. Некымын тӧлысь мысти нин Георгийлы Украинаса Михайловка дорын боевöй операцияысь сетӧмаӧсь «За отвагу» медаль, нӧшта кад кольыштӧм бӧрын Днепр ю форсируйтӧмысь — Гöрд Звезда орден. А Серет ю вуджигӧн том сапёрлысь взводсӧ мӧдӧдӧмаӧсь разведкаӧ — корсьны миян войскалы мӧдар берегӧ вуджанін, ӧд поскыс минируйтӧма. Георгий аддзӧма петан туй — понтон пыдди чери кыян пыжъяс ӧтувтӧмӧн салдатъяс да техника вуджӧмаӧсь мӧдлапӧлӧ да дзик пыр сувтӧмаӧсь вӧрӧглы паныд. Таысь Георгийлы сетӧмаӧсь Геройлысь ним! Но сэк жӧ Георгий Фёдорович вӧлі вежавидзысь мортӧн, пыдди пуктіс матыссасӧ да ассьыс землякъяссӧ. Надежда Пунегова Йöлöга, 2020, Рака 27 лун [27 марта] (2 №) |
